Bólginn ökkli og tilhlökkun að leika aftur

Sandra Erlingsdóttir landsliðskona og leikmaður EH Aalborg. Mynd/EH Aalborg Support

Keppni hefst á nýjan leik í B-deild danska handboltans á morgun en gert var hlé um síðustu mánaðarmót þegar Danir stigu fastar á hemlana til að draga út smiti kórónuveiru. Sandra Erlingsdóttir og samherjar í EH Aalborg taka á móti Ringköbing á heimavelli. Um toppslag verður að ræða. Álaborgarliðið er í efsta sæti með fullt hús stig, 14, eftir sjö leiki en Ringköbing er í þriða sæti með 11 stig.

„Það er mikil tilhlökkun að byrja aftur,“ sagði Sandra við handbolta.is í morgun en mánuður er liðin síðan EH Aalborg lék síðast en það var 24. október. Sandra var annars óheppin því hún missteig sig á hægri ökkla á æfingu fyrir viku og varð að draga úr æfingum þangað til í gær.

„Ég var í fyrsta sinn með á fullu á æfingu í gær. Ég geri ráð fyrir að leika þrátt fyrir allt. Sem betur fer þá hvorki slitnaði eitthvað í ökklanum né brotnaði,“ sagði Sandra sem treystir á að sjúkraþjálfari liðsins búi vel um ökklann fyrir átökin við Ringköbing.

Sandra hefur leikið afar vel fyrir EH Aalborg á leiktíðinni og verið í lykilhlutverki hjá liðinu sem hefur átt afar góðu gengi að fagna. „Við erum bara heilt yfir mjög spenntar og tilbúnar til að byrja aftur að spila,“ sagði Sandra Erlingsdóttir.

a>
- Auglýsing -

Nýjustu fréttir

- Auglýsing -