Kristján Örn Kristjánsson, Donni, í skotstöðu í leik með PAUC í Frakklandi. Mynd/PAUC

Kristján Örn Kristjánsson, Donni, og félagar hans í PAUC-Aix fóru vel af stað í frönsku 1. deildinni í handknattleik í kvöld. Þeir unnu Limoges á heimavelli með tveggja marka mun, 31:29. Donni skoraði fimm mörk úr átta tilraunum, þar af skoraði hann tvö af síðustu þremur mörkum liðsins á spennandi endaspretti. Einnig átti hann a.m.k. þrjár stoðsendingar.

Donni er óðum að ná fyrri styrk eftir að hafa veikst illa af kórónuveirunni í vor.


PAUC var með frumkvæðið í leiknum frá upphafi til enda en tókst aldrei að slíta sig almennilega frá sprækum leikmönnum Limoges-liðsins sem fengu m.a. Íslandsvininn og Slóvenann, Jure Dolenec, til liðs við sig í sumar frá Barcelona. Dolenec skoraði sex mörk.


Elvar Ásgeirsson var ekki í leikmannahópi nýliða Nancy þegar liðið tapaði á grátlegan hátt á útivelli fyrir Chartres, 28:27. Boltinn var dæmdur af liði Nancy þegar nokkrar sekúndur voru til leiksloka. Leikmenn Chartres náðu skyndisókn þar sem einn leikmaður liðsins kastar í liðsmann Nancy sem er á leið í vörn. Dómararnir töldu leikmann Nancy hafa viljandi orðið fyrir skotinu. Dæmdu þeir vítakast sem Chartres skoraði úr á síðustu sekúndu og vann leikinn.


Ólafur Andrés Guðmundsson þreytir frumraun sína í frönsku 1. deildinni á morgun þegar Montpellier fær St Raphaël í heimsókn. Ólafur Andrés gekk til liðs við Montpellier í júlí.

- Auglýsing -

Nýjustu fréttir

- Auglýsing -