Elín Jóna semur við Ringkøbing Håndbold

Elín Jóna Þorsteinsdóttir, landsliðsmarkvörður. Mynd/HSÍ

Elín Jóna Þorsteinsdóttir, landsliðsmarkvörður, hefur skrifað undir samning við Ringkøbing Håndbold en liðið vann í 1. deild á dögunum og tekur þar með sæti í dönsku úrvalsdeildinni í haust á nýjan leik eftir skamma dvöl í 1. deild.


„Elín er spennandi leikmaður sem við höfum haft auga á undanfarin tvö ár bæði hjá Vendsyssel og íslenska landsliðinu. Hún fékk kærkomna reynslu af keppni á meðal þeirra bestu í vetur. Það eru stórtíðindi að við höfum fengið Elínu til liðs við okkur. Hún á eftir að falla fullkomlega inní leikmannahóp Ringkøbing Håndbold,“ er m.a. haft eftir Jesper Holmris þjálfara liðsins á heimasíðu Ringkøbing Håndbold en hann er sagður í sjöunda himni með komu íslenska landsliðsmarkvarðarins. Holmris er þrautreyndur þjálfari sem m.a. hefur þjálfað landslið Sviss og Japan auk nokkurra félagsliða.

Ringkøbing er lítill og snotur bær á vesturströnd mið-Jótlands. Auður Jónsdóttir, systir Rutar Jónsdóttur, landsliðskonu, lék með liði Ringkøbing Håndbold fyrir ríflega áratug.


Vendsyssel greindi frá því á föstudaginn að Elín Jóna væri á leið frá félaginu eftir þriggja ára veru. Hún varði 222 skot í 26 leikjum Vendsyssel í dönsku úrvalsdeildinni í vetur sem leið.

- Auglýsing -

Nýjustu fréttir

- Auglýsing -