Elvar Örn skotfastastur í Þýskalandi – Bjarki Már lék lengst allra

Elvar Örn Jónsson í æfingaleik með Melsungen. Mynd/MT Melsungen

Selfyssingurinn Elvar Örn Jónsson, leikmaður MT Melsungen, var skotfastasti leikmaður þýsku 1. deildarinnar á keppnistímabilinu sem lauk á sunnudaginn samkvæmt tölfræði deildarinnar en hvert einasta markaskot er mælt með viðurkenndum aðferðum með aðstoð tölvutækninnar. Elvar Örn lét sér ekki nægja að eiga fastasta markskotið á leiktíðinni heldur er annað skot hans í fimmta sæti á sama lista.


Skot Elvars í leik gegn Lübbecke í 26. umferð mældist á 140,92 km hraða og það síðara sem kemst inn á topp fimm lista deildarinnar var í næstu umferð á eftir, 140,58 km í leik við Göppingen 7. apríl, fjórum dögum eftir bylmingsskotið gegn Lübbecke.


Elvar Örn meiddist á vinstri öxl í landsleik stuttu síðar og lék ekkert með Melsungen á endasprettinum. Hann verður vonandi klár í slaginn með sín þrumuskot þegar eitthvað verður komið inn á næsta keppnistímabil.


Næstur á eftir Elvari Erni er Gurardiola Villaplana hjá Lemgo sem átti skot sem mældist á 140,66 km hraða og þar á eftir er Simon Jeppson hjá Erlangen og fjórði er Harald Reinkind hjá Kiel sem náði jafnföstu skoti á markið og það næst fastasta hjá Elvari Erni.

Bjarki Már Elísson leikmaður Lemgo og íslenska landsliðsins. Mynd/Hafliði Breiðfjörð

Lék með í nærri 30 klukkustundir

Bjarki Már Elísson lék allra manna lengst af öllum leikmönnum deildarinnar. Hann var inni á í 29 klukkustundir, 50 mínútur og þrjár sekúndur. Hann var þar með aðeins utan vallar i fjórar stundir og rétt tæpar tíu mínútur.


Næstur á eftir Bjarka Má var samherji hans Jonathan Carlsbogard. Svíinn var með í 29 klukkusundir, 46 mínútur og 25 sekúndur. Þar á eftir voru Dejan Milosavljev, Füchse Berlin, Peter Strosack, Nettelsted og Lukas Mertens, SC Magdeburg.

Hljóp rúma 144 km

Bjarki Már lét ekki sér nægja að vera lengst allra leikmanna inni á leikvellinum í leikjum deildarinnar heldur var hann í öðru sæti á lista þeirra sem lögðu flesta kílómetra að baki. Bjarki Már hljóp alls 144,32 km. Peter Strosack, Nettelsted, hljóp lengst 149,09 km. Að jafnaði hljóp Bjarki Már 4,4 km í leik.

a>
- Auglýsing -

Nýjustu fréttir

- Auglýsing -