Hin þrautreynda handknattleikskona Martha Hermannsdóttir vonast til þess að mæta aftur út á handknattleiksvöllinn eftir þrjár til fjórar vikur með KA/Þórs-liðinu. Þetta sagði Martha í samtali við Seinni bylgjuna á Stöð2Sport en vísir.is vitnar til þess viðtals í dag. Ekki er langt síðan vangaveltur voru uppi um að Martha léki ekki meira með liðinu á keppnistímabilinu.
Martha meiddist á hæl í október sem leiddi til bólgu í hælnum og eða ilinni. Hún var sprautuð í desember með von um að fá bót meina sinna en fór sennilega of geist af stað við æfingar skömmu fyrir jól með þeim afleiðingum að hún fór nánast aftur á byrjunareit.
„Ég fór aftur í sprautu fyrir viku og þá sögðu þeir að ég mætti byrja aftur í handbolta eftir svona fjórar vikur. Ég þarf að leyfa þessu að gróa og svoleiðis. Ég er byrjuð að hlaupa aðeins inn á æfingu og ætla bara að vera skynsöm. Vonandi verð ég bara komin aftur á völlinn eftir þrjár eða fjórar vikur,“ sagði Martha m.a. í fyrrgreindu samtali við Seinni bylgjuna og visir.is.
KA/Þórsliðið hefur farið hressilega af stað eftir að keppni hófst aftur í Olísdeildinni í síðasta mánuði. Liðið hefur unnið þrjá leiki og gert eitt jafntefli og deilir nú um stundir efsta sæti Olísdeildarinnar með Val.
