Er úr leik fram á nýtt ár

Línumaðurinn sterki, Atli Ævar Ingólfsson, hefur ekki leikið með Selfossliðinu í tveimur síðustu leikjum liðsins í Olísdeildinni. Ekki er von á honum út á leikvöllinn á næstunni. Atli Ævar staðfesti við handbolta.is í dag að hann leiki ekki með Selfossi fyrr en upp verður runnið nýtt ár, 2022.

„Ég spilaði meiddur frá í haust og sprautaður fyrir Evrópuleikina í Tékklandi í síðasta mánuði. Það gekk fínt en síðan var tekin ákvörðun um að laga þetta núna. Ég verð ekki með fyrr en eftir jól ef allt gengur vel,“ sagði Atli Ævar sem hefur verið með allra bestu og aðsópsmestu leikmönnum Selfossliðsins síðustu ár.