- Auglýsing -
Aðalstjórn ÍBV hefur samþykkt að draga til baka umdeilda ákvörðun sína um breytta tekjuskiptingu á milli handknattleiksdeildar félagsins og knattspyrnudeildar sem ákveðin var í mars og hefur valdið úlfúð innan félagsins, svo vægt sé til orða tekið. M.a. sagði stjórn handknattleiksráðs af sér í lok júní og lýsti um leið yfir vantrausti á aðalstjórn ÍBV.
Vísir segir að á fundi aðalstjórnar með forvígismönnum knattspyrnu- og handknattleiksráðs hafi klæði verið borin á vopnin. Horfið er frá fyrri ákvörðun um tekjuskiptingu. Þess í stað verður skipaður sáttahópur um framtíðartilhögun á skiptingu tekna á milli deildanna.
Áður en aðalstjórn ÍBV tók umdeilda ákvörðun sína í mars skiptust tekjur af sameiginlegri fjáröflun á vegum aðalstjórnar jafnt á milli handknattleiks og knattspyrnu í Vestmannaeyjum. Eftir fyrirhugaða breytingu aðalstjórnar, sem nú hefur verið dregin í land, átti skiptingin að vera sú að nærri tveir þriðju hlutar tekna, eða 65 % áttu að renna til knattspyrnunnar, en 35% til handknattleiks.
Í tilkynningu aðalstjórnar sem Vísir hefur undir höndum segir að sáttahópur eigi að skila af sér tillögum til aðalstjórnar eigi síðar en 25. febrúar á næsta ári. Eftir það verður farið yfir tillögurnar með deildunum tveimur sem skuldbinda sig til þess að sætta sig við niðurstöðu sáttahópsins.
- Auglýsing -
