Kvennalið ÍBV í handknattleik hefur fengið liðsstyrk fyrir átökin í Olísdeild kvenna, hvenær sem tækifæri gefst til þess að hefja keppni á nýjan leik. Lina Cardell hefur skrifað undir samning um að leika með liði ÍBV út leiktíðina. Þetta kemur fram á Facebook-síðu Sävehof en hún hefur verið samningsbundin liði félagsins.
Cardell er örvhent og leikur í hægra horni. Hún er 19 ára gömul og hefur leikið 12 U-landsleiki fyrir Svíþjóð. Hún segir í samtali við Facebook-síðu Sävehof að samningurinn við ÍBV sé gerður fyrir milligöngu Birnu Berg Haraldsdóttur núverandi leikmanns ÍBV sem lék um nokkurt skeið með sænska liðinu.
Ekki hefur verið leikið í Olísdeild kvenna síðan síðla í september. ÍBV situr í efsta sæti deildarinnar með fimm stig eftir þrjá leiki.
