Fyrir lok þessarar viku, í allra síðasta lagi strax eftir helgi, liggur það fyrir hvort norska handknattleikssambandinu verði veitt tilslökun frá sóttvarnareglum í Noregi þannig að hægt verði að halda meira en helming leikja á Evrópumóti kvenna þar í landi í desember. Verði hún ekki veitt gætu Danir fengið allt mótið í fangið á elleftu stundu. Til stendur að Norðmenn og Danir haldi mótið saman.
Eins og sakir standa þá hafa norsk yfirvöld ekki verið tilbúin að kvika frá þeim reglum að komi upp smit hjá einum leikmanni í einhverju liðanna sem tekur þátt í EM í Noregi þá verður allt lið viðkomandi leikmanns sent heim. Ekki nóg með það heldur þurfa andstæðingar í síðasta leik einnig að pakka saman og fara heim. Eitt smit mun orsaka að tvö lið hætta keppni.
Þetta þykja svo strangar reglur að ef þeim verður haldið til streitu þá þykir ekki koma til greina að halda mótið í Noregi. Kemur þá tvennt til greina. Að Danir reyni að halda allt mótið eða að það verður fellt niður.
Per Bertelsen, formaður danska handknattleikssambandsins, sagði í síðasta mánuði að ef til þess kæmi þá gætu Danir haldið mótið gengu Norðmenn úr skaftinu. Bertelsen sagði þetta áður en öðrum leikstaðnum, íþróttahöllinni í Frederikshavn á norður-Jótlandi, var lokað í mánuð af yfirvöldum eftir að minkafárið kom upp.
Abid Raja, menningamálarherra Noregs, sagði eftir fund með forsvarsmönnum norska handknattleikssambandsins í dag að niðurstöðu væri að vænta í kringum næstu helgi. Líta verði til þess hvort smitum í Noregi fjölgaði eða fækkaði á næstu dögum eftir að hert var á reglum á nokkrum svæðum landsins. Ljóst væri að ekki mætti dragast mikið lengur að taka ákvörðun, af eða á, varðandi EM.
Ekki aðeins mun EM kvenna í handbolta vera í húfi í Noregi heldur einnig heimsmeistaramót í Norrænum greinum skíðaíþrótta sem stendur til að halda í Lillehammer í næsta mánuði.
Norðmenn og Danir halda Evrópumótið í handknattleik kvenna í sameiningu. Í Danmörku verður látið nægja að senda smitaðan leikmann í einangrun og síðan til síns heima. Varamaður kallaður inn og lið hans heldur áfram keppni og síðasti andstæðingur á vellinum verður ekki látinn súpa seyðið. Norska handknattleikssambandið rær að því öllum árum að fá undanþágu heima fyrir svo að sömu reglur verði í gildi í Noregi og í Danmörku.
