Bjarki Már Elísson verður ekki með landsliðinu í leiknum við Litháa. Mynd/EPA

Guðmundur Þórður Guðmundsson, landsliðsþjálfari í handknattleik karla, hefur orðið að gera enn eina breytinguna á landsliðshópnum fyrir leikinn gegn Litháen á miðvikudagskvöld í Laugardalshöll.

Bjarki Már Elísson, hornamaður Lemgo og næst markahæsti leikmaður þýsku 1. deildarinnar nú um stundir, er forfallaður, eftir því sem fram kemur í tilkynningu frá Handknattleikssambandi Íslands.

Í stað Bjarka Más hefur hornamaðurinn ungi úr Haukum, Orri Freyr Þorkelsson verið kallaður inn í landsliðið og verður með á fyrstu æfingu liðsins í fyrramálið undir stjórn Gunnars Magnússonar, aðstoðarlandsliðsþjálfara. Guðmundur Þórður Guðmundsson er ekki væntanlegur til landsins fyrr en líður á morgundaginn ásamt nokkrum leikmönnum sem eiga fyrir höndum leiki með félagsliðum sínum í dag í Þýskalandi og í Noregi.

Orri Freyr Þorkelsson var markahæstur hjá Haukum í sigrinum á Stjörnunni með 10 mörk. Mynd/Haukar

Þar með verður staða vinstri hornamanns landsliðsins skipuð tveimur leikmönnum úr Olísdeildinni í leiknum við Litháen. Hinn hornamaðurinn er Hákon Daði Styrmisson úr ÍBV, sem kom inn í landsliðshópinn á föstudaginn í stað Odds Gretarssonar, Balingen.

Alls hafa fjórir leikmenn orðið að draga sig úr landsliðshópnum síðan hann var valinn. Þeir eru auk Bjarka Más, Arnór Þór Gunnarsson, Kristján Örn Kristjánsson og Oddur Gretarsson.

Einn landsliðsmaður er þegar kominn til landsins eftir því sem handbolti.is kemst næst. Aron Pálmarsson kom til landsins í gær og gekkst strax undir skimun og dvelst nú í sóttkví.

Leikurinn við Litháen í undankeppni EM2022 fer fram í Laugardalshöll á miðvikudagskvöld. Flautað verður til leiks klukkan 19.45. Engum áhorfendum verður hleypt inn í Laugardalshöllina en viðureignin verður sýnd á RÚV.

- Auglýsing -

Nýjustu fréttir

- Auglýsing -