Frá Fram til þýsku meistaranna

Emma Olsson með upprétta handleggi í vörn Fram. Mynd/Egill Bjarni Friðjónsson

Sænska handknattleikskonan Emma Olsson hefur samið við þýsku meistarana Borussia Dortmund og kveður þar með herbúðir Fram þegar keppnistímabilinu lýkur eftir eins árs veru. Um svipað leyti flytur Fram herbúðir sínar úr Safamýri og í Úlfarsárdal.


Á heimasíðu Borussia Dortmund segir að Olsson, sem er 24 ára gömul, hafi skrifað undir eins árs samning. Ákvæði er í samningnum um að bæta ári við ef báðum aðilum býður þannig við að horfa. Olsson kom til Fram frá Önnereds í Gautaborg.


Olsson hefur verið einn besti leikmaður Olísdeildar kvenna á leiktíðinni. Frábær varnarmaður og verið öflug í sóknarleiknum og þá sem línumaður en hefur átt til að koma varnarmönnum andstæðinganna í opna skjöldu með langskotum. Olsson hefur skorað 67 mörk í deildinni í 18 leikjum.


Borussia Dortmund hefur verið með jafn besta kvennaliðið í þýskum handknattleik á síðustu árum auk þess að taka þátt í Meistaradeild Evrópu. Dortmund féll úr leik á dögunum í fyrstu umferð útsláttarkeppni Meistaradeildar.


Talsverðar breytingar standa fyrir dyrum á leikmannahópi Dortmund í sumar. Olsson er sjöundi nýi leikmaðurinn sem samið hefur verið viðá undanförnum vikum.

- Auglýsing -

Nýjustu fréttir

- Auglýsing -