Viktor Gísli Hallgrímsson, markvörður íslenska landsliðsins og danska úrvalsdeildarliðsins GOG á Fjóni. Mynd/EPA

Landsliðsmarkvörðurinn Viktor Gísli Hallgrímsson er orðaður við franska stórliðið Nantes, sem m.a. leikur í Meistaradeild Evrópu. Fullyrt var í hlaðvarpsþættinum HM handkastið í gær að Viktor Gísli gangi til liðs við Nantes sumarið 2022.

Vitað er að Nantes leitar að markverði þessa dagana til þess að koma í sað Danans Emil Nielsen sem verður að öllum líkindum liðsmaður Barcelona frá sumrinu 2022. Nielsen sló í gegn með Skjern og gekk til liðs við Nantes sumarið 2019 þar sem hann hefur blómstrað og er nú einn þriggja markvarða danska landsliðsins sem tekur þátt í HM í Egyptalandi. Verður það fyrsta stórmót Nielsen með A-landsliðinu.


Eftir því sem handbolti.is kemst næst þá hafa verið þreifingar á milli Nantes og Viktors Gísla eða umboðsmanns hans í þá veru að markvörðurinn ungi gangi til liðs við Nantes. Hvort samningar séu í höfn hefur ekki fengist staðfest. Viktor Gísli mun ekki tjá sig um þessar þreifingar eða meintu skipti fyrr en í fyrsta lagi eftir að þátttöku Íslands á HM verður lokið. Það fékk handbolti.is a.m.k. staðfest í morgun.

Viktor Gísli gekk til liðs við GOG í Danmörku sumarið 2019 og varð bikarmeistari með liðinu í haust sem leið.

- Auglýsing -

Nýjustu fréttir

- Auglýsing -