Fyrstu hindrun rutt úr vegi

KA/Þór vann meistarakeppni HSÍ, Olísdeildina og Íslandsmeistaratitilinn á síðasta keppnistímabilini. Mynd/Egill Bjarni Friðjónsson

Deildarmeistarar KA/Þórs ruddu fyrstu hindruninni úr vegi í átt að fyrsta Íslandsmeistaratitli sínum með verðskulduðum þriggja marka sigri á Val, 24:21, í KA-heimilinu í kvöld að viðstöddum fjölmörgum áhorfendum og frábærri stemningu. Næsti leikur liðanna fer fram í Origohöllinni, heimavelli Vals, á sunnudaginn. Staðan var jöfn að loknum fyrri hálfleik, 10:10.

Valur hóf síðari hálfleik betur og náði tveggja marka forskoti eftir um tíu mínútna leik. Varnarleikurinn var ekki eins og á best var á kosið framan af hjá KA/Þór og skarð var fyrir skildi eftir að Martha Hermannsdóttir fékk sína þriðju brottvísun á 37. mínútu.

Ákvörðun sem sneri leiknum

Andri Snær Stefánsson, hinn yfirvegaði þjálfari KA/Þórs tók leikhlé þegar 17 mínútur voru til leiksloka þegar lið hans var tveimur mörkum undir, 16:14. Eftir leikhléið fór KA/Þór í sjö manna sóknarleik. Bragðið gekk fullkomlega upp og KA/Þór skoraði sex mörk af næstu sjö mörkum leiksins. Eftir hléið þéttist líka varnarleikurinn, ekki síst á miðjunni. KA/Þórsliðið hafði þá náð áttum eftir að Mörthu naut ekki lengur við.


Valsliðið átti engin svör eftir að það lenti þremur mörkum undir, 20:17 og 21:18. KA/Þórsliðið hélt sínu striki af yfirvegun. Sóknarleikurinn var mjög góður og varnarleikurinn batnaði þegar á leið. Matea Lonac varði einnig vel í markinu.


Valsliðið missti yfirvegun þegar á leið og því fór sem fór gegn hinu sterka KA/Þórsliði sem gerir fá mistök, alltént ekki mörg alvarleg.


Mörk KA/Þórs: Rut Arnfjörð Jónsdóttir 8/2, Aldís Ásta Heimisdóttir 6, Rakel Sara Elvarsdóttir 3, Anna Þyrí Halldórsdóttir 2, Martha Hermannsdóttir 2, Hulda Bryndís Tryggvadóttir 1, Kristín Aðalheiður Jóhannsdóttir 1, Sólveig Lára Kristjánsdóttir 1.
Varin skot: Matea Lonac 12, 36,4%.
Mörk Vals: Lovísa Thompson 8, Lilja Ágústsdóttir 4/4, Auður Ester Gestsdóttir 4, Thea Imani Sturludóttir 2, Elína Rósa Magnúsdóttir 2, Hulda Dís Þrastardóttir 1.
Varin skot: Saga Sif Gísladóttir 12, 38,7% – Margrét Einarsdóttir 3, 37,5%.

a>
- Auglýsing -

Nýjustu fréttir

- Auglýsing -