Danski markvörðurinn Jannick Green hefur samið við franska meistaraliðið PSG. Sannarlega er ekki ráð nema í tíma sé tekið en Green flytur til Parísar eftir ár þegar samningur hans við Evrópumeistara SC Magdeburg verður að fullu uppfylltur. Sáttmáli Green við PGS er til tveggja ára, fram á mitt árið 2024.
Green, sem er 32 ára gamall, kemur í stað franska landsliðsmarkvarðarins Vincent Gérard sem á dögunum var tilkynnt að ekki væri lengur áhugi fyrir starfskröftum hans hjá Parísarliðinu að loknu næsta keppnistímabili.
Green hefur verið í herbúðum SC Magdeburg frá 2014 og verið á þeim tíma einn besti markvörður þýsku 1. deildarinnar. Hann átti stórleiki þegar Magdeburg vann undanúrslitaleikinn og úrslitaleikinn í Evrópudeildinni í vor. Green var árum saman annar markvörður danska landsliðsins og var m.a. í sigurliðinu á Ólympíuleikunum 2016 og á HM 2019 einnig í silfurliði Dana á HM 2013 og á EM árið eftir.
Green hefur ekki átt upp á pallborðið hjá Nikolaj Jackobsen landsliðsþjálfara Dana upp á síðkastið enda eiga Danir hóp góðra markvarða.
