Handknattleiksmaðurinn Guðmundur Árni Ólafsson var í dag valinn íþróttakarl Aftureldingar fyrir árið 2020. Þetta er í fyrsta sinn sem Guðmundur Árni hlýtur þessa nafnbót en Afturelding hefur staðið fyrir vali á íþróttkarli og -konu ársins í nærri hálfa öld.
Sesselja Líf Valgeirsdóttir, knattspyrnukona var valin íþróttakona Aftureldingar.
Athöfnin þar sem valið var tilkynnt fór fram utandyra í morgun við íþróttamannvirkin að Varmá.
Hver deild innan Aftureldingar útnefndi íþróttakarl og -konu úr sínum röðum. Þriggja manna nefnd á vegum aðalstjórnar fór yfir tilnefningarnar og kom með tillögur til aðalstjórnar til samþykktar.
Guðmundur Árni og Ragnhildur Hjartardóttir voru einnig heiðruð en þau voru valin handknattleiksfólk ársins hjá Aftureldingu.
Rökin fyrir valinu á Guðmundi voru eftirfarandi:
„Guðmundur lék mjög vel á seinni hluta síðasta tímabils. Hann var markahæsti leikmaður Aftureldingar og endaði hann sem næst markahæsti leikmaður Olís deildarinnar. Guðmundur var lykilmaður liðsins sem endaði í 3. sæti Olís deildarinnar, en liðið var á góðri siglingu þegar COVID19 lokun skall á. Hann hefur leikið mjög vel á þessu tímabili og er liðið núna á toppnum í Olís deild karla. Á dögunum var Guðmundur valinn í 35 manna landsliðhóp fyrir HM í Egyptalandi sem hefst núna í janúar.
Guðmundur Árni er mikill leiðtogi innan- sem utanvallar. Hann æfir vel, leggur mikið á sig og er frábær fyrirmynd fyrir okkar ungu og efnilegu leikmenn.
