Halldór Stefán brýtur blað við stjórnvölin hjá Volda

Halldór Stefán Haraldsson, hefur unnið mjög gott starf hjá Volda í Noregi. Mynd/Volda

Halldór Stefán Haraldsson stýrir Volda í norsku úrvalsdeildinni í handknattleik kvenna á næsta keppnistímabili. Þetta varð staðreynd í dag þegar Volda vann Levanger örugglega á heimavelli, 36:22, í næst síðustu umferð deildarinnar.

Fyrir síðustu umferðina hefur Volda tveggja stiga forskot á Gjerpen HK Skien auk þess að standa betur að vígi í innbyrðisleikjum liðanna. Gjerpen HK Skien vann einnig örugglega í dag.


Volda hefur aldrei áður öðlast sæti í norsku úrvalsdeildinni og í raun er liðið það fyrsta frá Suður-Mæri sem nær svo langt í kvennahandknattleik í Noregi.


Þegar Halldór Stefán tók við þjálfun liðsins fyrir sex árum var liðið í 2. deild. Síðan hefur liðið byggst hægt og rólega upp með þeim árangri sem nú hefur náðst. Hilmar Guðlaugsson, fyrrverandi þjálfari hjá HK og Selfossi, hefur verið Halldóri Stefáni til halds og trausts við þjálfun liðsins undanfarin tvö ár.


Katrín Tinna Jensdóttir, unglingalandsliðskona, hefur leikið með Volda í vetur með góðum árangri, verið kjölfesta í góðri vörn liðsins.

Sara Dögg markahæst

Sara Dögg Hjaltadóttir var markahæst hjá Gjerpen HK Skien með átta mörk þegar liðið vann stórsigur á Ålgård, 31:20, á útivelli í 1. deildinni í dag. Gjerpen Skien fer í umspil um sæti í efstu deild ásamt Haslum Bærum og Levanger sem eru í þriðja og fjórða sæti.

- Auglýsing -

Nýjustu fréttir

- Auglýsing -