Ákveðið hefur verið að fresta viðureign Noregs og Lettlands í undankeppni EM2022 í handknattleik karla sem til stóð að færi fram í Noregi miðvikudaginn 4. nóvember.
Handknattleikssamband Evrópu, EHF, samþykkti að fresta leiknum eftir að hafa farið yfir stöðuna með handknattleikssamböndum Noregs og Lettlands. Strangar sóttvarnareglur í Noregi eru ástæða þess að gripið er til þess ráðs að fresta leiknum. Ekki kom til greina að norsk sóttvarnayfirvöld veittu landsliði Lettlands undanþágu frá tíu daga sóttkví við komuna til landsins.
Talsmaður norska handknattleikssambandsins þykir leitt að þetta hafi orðið niðurstaðan. Skoðað hafi verið að færa leikinn til Lettlands en það hafi ekki reynst mögulegt með svo skömmum fyrirvara.
Til stendur að norska landsliðið leiki við ítalska landsliðið í undankeppninni 8. nóvember. Sá leikur á að fara fram í Pescara á Ítalíu og er enn á áætlun.
