Alfreð Gíslason, landsliðsþjálfari Þýskalands í handknattleik karla, fékk hótunarbréf í pósti þar sem lagt er að honum að segja starfi sínu lausu strax annars megi hann eiga von á heimsókn þar sem látið er að því liggja að skemmdir verði unnar á húsi hans.
„Við viljum að landsliðsþjálfari Þjóðverja sé þýskur. Hegðun þín fer í taugarnar á okkur. Segðu af þér að öðrum kosti komum við heim til þín gerum eitthvað við húsið þitt. Við bíðum,“ segir m.a. í bréfinu sem Alfreð birtir á Instagram síðu sinni ásamt annarri mynd af umslaginu.
„Bréf beið mín í póstkassanum í morgun. Eftir tæplega 30 ára búsetu í þessu frábæra landi var mér hótað í fyrsta skipti,“ skrifar Alfreð með myndinni. „Þekkir einhver rithönd þessa „aðdáanda míns?“ spyr Alfreð með myndinni af umslaginu.
Alfreð tók við þjálfun þýska landsliðinu fyrir ári og undir hans stjórn tryggði landsliðið sér sæti í handknattleikskeppni Ólympíuleikanna sem fram fara í Japan í sumar.
