Leikmenn Kríu eru ólíkindatól. Mynd/Ívar

Daði Laxdal Gautason, leikmaður Kríu og einn forsvarsmanna félagsins, segir í samtali við RÚV í dag að óvíst sé hvort Kría taki sæti í Olísdeild á næstu leiktíð, eða úrvalsdeild eins og segir í fréttinni. Kría vann sér í gærkvöld inn þátttökurétt í Olísdeild karla á næstu leiktíð eins og kom fram á handbolti.is í gærkvöld.


Síðast kom sú staða upp vorið 2017 að lið heyktist á þátttöku í Olísdeild karla. Þá runnu tvær grímur á forráðamenn KR eftir að lið félagsins vann sér sæti í Olísdeild. Í framhaldinu heyktust KR-ingar á útgerðinni og lögðu árar í bát. Víkingur tók þá sæti í Olísdeild en liðið hafði áður tapað fyrir KR í umspili. Fjórum árum síðar gætu forsvarsmenn Víkings staðið frammi fyrir sömu spurningu.

  • Ef lið Kríu hættir við þátttöku í Olísdeild karla kemur það í hlut forráðamanna Víkings að svara þeirri spurningu hvort þeir vilji taka sæti Kríu.
  • Ef ekki verður áhugi af hálfu Víkinga á sætinu þá kemur röðin að Þórsurum frá Akureyri að gera upp hug sinn.
  • Sé ekki áhugi af hálfu Þórsara kemur að ÍR-ingum að hrökkva eða stökkva.
  • Reynist ekki áhugi hjá Víkingi, Þór eða ÍR, í þessari röð, þá verður Fjölnir fjórði kosturinn.

    Reglur HSÍ eru skýrar og eru sem hér segir:

    Höfnun á þátttökurétt í úrvalsdeild.
    Dragi lið sig úr úrvalsdeild eða hafni lið því að taka sæti í úrvalsdeild skulu lið fá það sæti í þessari röð.
  • Lið sem tapar úrslitum umspils.
  • Lið sem féll úr úrvalsdeild í efra sæti.
  • Lið sem féll úr úrvalsdeild í neðra sæti.
  • Efsta lið 1. deildar sem hefur ekki unnið sér sæti í úrvalsdeild.

    Hafi lið unnið sér rétt til að taka sæti í úrvalsdeild en hafnar því skal það sæta sektum.
- Auglýsing -

Nýjustu fréttir

- Auglýsing -