Jóhannes Berg fetar í fótspor fjölskyldunnar í Krikanum

Ásgeir Jónsson formaður handknattleiksdeildar FH t.v. ásamt Jóhannesi Berg Andrasyni. Mynd/FH

Jóhannes Berg Andrason hefur skrifað undir þriggja ára samnig við handknattleiksdeild FH. Jóhannes Berg er 19 ára gamall, örvhent skytta sem kemur til FH frá uppeldisfélagi sínu Víkingi. Hann var næst markahæsti leikmaður Víkings í Olísdeildinni með 99 mörk í 22 leikjum.


Með skiptunum yfir í FH fetar Jóhannes Berg í fótspor föður síns Andra Berg Haraldssonar og ömmu sinnar, Margrétar Theodórsdóttur, sem einnig léku með FH á ferli sínum á handknattleiksvellinum að ógleymdri föðursysturinni, Birnu Berg Haraldsdóttur.


„Það er mjög ánægjulegt að hafa náð samkomulagi við Jóhannes Berg um að leika með FH næstu árin. Jóhannes Berg er virkilega öflug skytta og frábær varnamaður sem hefur sýnt sig og sannað í Olís-deildinni í vetur þrátt fyrir ungan aldur. Jóhannes Berg er ungur og metnaðarfullur leikmaður sem ætlar sér langt. Hann hefur verið að leika stórt hlutverk í yngri landsliðum undanfarin ár og mun styrkja FH liðið. Við hlökkum mikið til að sjá hann blómstra í FH treyjunni næstu árin,“ segir Ásgeir Jónsson formaður handknattleiksdeildar FH í tilkynningu handknattleiksdeildar FH.


Jóhannes Berg er annað ungstirnið í handknattleik hér á landi sem FH-ingar klófesta á skömmum tíma. Á dögunum skrifaði Einar Bragi Aðalsteinsson undir samning við FH.

- Auglýsing -

Nýjustu fréttir

- Auglýsing -