- Auglýsing -
Handknattleiksmaðurinn Hamza Kablouti fékk á föstudaginn leikheimild með Víkingi og verður væntanlega með liðinu í kvöld þegar það fær Gróttu í heimsókn í Víkina í viðureign liðanna í 9. umferð Olísdeildar karla. Flautað verður til leiks klukkan 18.
Til viðbótar við komu Kablouti þá kölluðu Víkingar Loga Ágústsson úr láni frá venslafélagi sínu, Berserkjum. Logi hefur einnig fengið leikheimild og verður þar með gjaldgengur með Víkingum í kvöld ef Jón Gunnlaugur Viggósson þjálfari Víkings kýs svo.
Kablouti, sem er af frönsku og túnísku bergi brotinn, kom til Aftureldingar frá Ivry í Frakklandi fyrir keppnistímabilið en náði ekki að skjóta djúpum rótum í Mosfellsbæ. Lánasamningur Aftureldingar og Víkings um Kablouti gildir til loka ársins.
Logi þekkir vel til í herbúðum Víkinga en hann lék m.a. með liðinu á síðasta keppnistímabili í Grill66-deildinni.
Stöðuna í Olísdeild karla er að finna hér.
- Auglýsing -
