Guðmundur Bragi Ástþórsson skoraði 12 mörk í dag. Mynd/Haukar

„Ég er mjög ánægður með traustið sem Gunni þjálfari sýnir mér og þakklátur fyrir þann leiktíma sem ég hef fengið fram til þessa,“ sagði Guðmundur Bragi Ástþórsson, miðjumaður, sem leikur um þessar mundir sem lánsmaður hjá Aftureldingu. Guðmundur Bragi er félagsbundinn Haukum en var lánaður til Aftureldingar um síðustu mánaðarmót til þess að brúa bilið meðan nokkrir leikmenn liðsins eru fjarri góðu gamni vegna meiðsla.


„Tilgangurinn með komunni til Aftureldingar er einfaldlega sá að spila sem mest, ná úr mér stressinu við að spila í Olísdeildinni og fylla í skarðið hjá Aftureldingarliðinu um tíma. Þetta hefur verið góður tími. Ég fer ekki aftur til Hauka fyrr en í vor nema að Haukar kalli fyrr í mig,“ sagði Guðmundur sem er 18 ára gamall og var að leika sinn fjórða leik fyrir Aftureldingu í gærkvöld þegar Mosfellingar tóku á móti ÍBV.


Leikmannahópur Hauka er fjölmennur um þessar mundir og ekki heiglum hent að vinna sér sæti í Olísdeildarliðinu. Þess vegna sá Guðmundur Bragi fram á að leika mest með ungmennaliðinu í Grill 66-deildinni. Af þeim sökum þótti honum upplagt að taka boði Aftureldingar úr því að forráðamenn Hauka voru samþykkir að gefa hann eftir um tíma. Í Grill 66-deildinni var Guðmundur Bragi reyndar næst markahæstur með 65 mörk í sex leikjum. Hann hefur þegar skorað 18 mörk í fjórum leikjum með Aftureldingu og átt þátt í fjölda marka með stoðsendingum sínum.


„Ég hef fallið vel inn í hópinn hjá Aftureldingu. Auk þess þá þekki ég Gunnar þjálfara mjög vel. Hann þjálfaði mig lengi þegar hann var hjá Haukum. Við náum vel saman,“ sagði Guðmundur Bragi Ástþórsson, leikmaður Aftureldingar, sem hefur komið hressilega inn í liðið eftir að hann var lánaður frá Haukum í upphafi mánaðarins.

- Auglýsing -

Nýjustu fréttir

- Auglýsing -