Mindaugas Andriuska landsliðsþjálfari Litháen í karlaflokki. Mynd/heimasíða Handknattleikssambands Litháen.

Keppni í riðli íslenska landsliðsins í undankeppni EM karla er í uppnámi. Landslið Litháen sem átti að fara til Ísraels í morgun lagði ekki af stað vegna þess að flug þess frá Istanbúl til Tel-Aviv var fellt niður en reyna átti að fara frá Vilnius til Istanbúl og þaðan áfram.


Til stóð og stendur enn til reyndar að Litháen leiki við landslið Ísraels í undankeppninni í Tel-Aviv annað kvöld. Á fimmtudagskvöld á íslenska landsliðið að leika við landslið Ísraels á sama stað.


Eftir því sem fram kemur á heimasíðu Handknattleikssambands Litháen er beðið svara frá Handknattleikssambandinu Evrópu, EHF, hvað gera skuli í þessari stöðu sem er upp komin. Ljóst er að leikurinn fer ekki fram í gegnum fjarfundarbúnað. Þess utan eru ekki margir lausir keppnisdagar til landsleikja á næstu mánuðum.


Eftir því sem næst verður komist eru nánast engar flugsamgöngur á milli Evrópu og Ísraels um þessar mundir. Ástæðan er sú að áhugi fyrir ferðalögum til og frá Ísrael er takmarkaður meðan kórónuveiran er á sveimi. Áætlaðar ferðir frá ýmsum löndum Evrópu til og frá Ísrael hafa verið felldar niður.


Ísraelsmenn hafa aðeins lokið einum leik í undankeppni EM. Þeir náðu að leika við portúgalska landsliðið í byrjun nóvember í Porto. Á þeim tíma var Ísrael nánast lokað og var m.a. viðureign Íslands og Ísraels frestað. Til stendur að hún fari fram á fimmtudagskvöldið í Tel-Aviv. Um þessar mundir er hinsvegar eitt að vilja og annað að geta eins og landsliðsmenn Litháen fengu að reyna í morgun.

- Auglýsing -

Nýjustu fréttir

- Auglýsing -