Í sóttkví í Zwickau

Díana Dögg Magnúsdóttir landsliðskona í handknattleik. /BSV Sachsen Zwickau

Einn samherji Díönu Daggar Magnúsdóttur hjá þýska handknattleiksliðinu BSV Sachsen Zwickau greindist í gær með kórónuveiruna. Af þeim sökum hefur leikmönnum og starfsmönnum liðsins verið skipað að fara í sóttkví. Leik BSV Sachsen Zwickau sem fram átti að fara á heimavelli í dag hefur verið frestað um óákveðinn tíma. Díana Dögg sagði við handbolta.is í morgunsárið að hún finni ekki fyrir einkennum en fyrir dyrum standi að fara í kórónuveirupróf og sennilega fleiri en eitt með nokkurrar daga millibili.


„Við mættum bara eins og venjulega á æfingu og videófund í gær en þá fengum við fregnirnar,” sagði Díana Dögg, en liðsfélagi hennar sem greindist með veiruna í gærdag tók þátt í tveimur æfingum með Zwickau-liðinu á fimmtudag.


„Ég held við verðum allar settar í test á mánudag en það er allt mjög óljóst enn þá,” sagði Díana Dögg sem bíður eftir að heyra nánar frá forráðamönnum liðsins um næstu skref en ljóst væri að næstu dagar færi í einangrun.


Kórónuveiran hefur ekki verið eins útbreidd í austurhluta Þýskalands en svo virðist sem nú sé að verða breyting á, a.m.k. segir Díana Dögg að búa verði sig undir vaxandi útreiðslu og huga þar með enn betur að sóttvörnum.

- Auglýsing -

Nýjustu fréttir

- Auglýsing -