Kría hefur hætt við að keppa í Olísdeild karla á komandi keppnistímabili í handknattleik og mun heldur ekki senda lið til keppni í Grill66-deild karla. Þetta hefur handbolti.is samkvæmt nokkrum hemildarmönnum.
Forsvarsmenn Kríu hafa þegar tilkynnt Handknattleikssambandi Íslands að þeir ætli að bakka út úr allri keppni á Íslandsmótinu. Kría vann sér inn sæti í Olísdeildinni í vor eftir sigur á Víkingi í umspili um sæti. Víkingi stendur til boða að taka sæti Kríu í Olísdeildinni.
Forsvarsmaður Kríu sagði í skilaboðum til handbolta.is í dag að tilkynningar væri að vænta á næstu dögum en tjáði sig ekki að öðru leyti.
Eftir því sem handbolti.is kemst næst hafa forsvarsmenn HSÍ sett sig í samband við Víkinga og boðið þeim að taka sæti Kríu í Olísdeildinni enda fyrsta varalið við þessar aðstæður samkvæmt reglugerð Handknattleikssambandsins. Víkingar hafa ekki gert upp hug sinn eftir því sem næst verður komist. Í fyrsta lagi mun málið hafa komið upp í gærkvöld auk þess sem menn eru út og suður í sumarleyfum um þessar mundir.
Ef til þess kemur að Víkingar þiggi ekki sætið er Þór Akureyri annað varalið og ÍR þriðja varalið samkvæmt fyrrgreindri reglugerð.
Óvissa hefur verið uppi um þátttöku Kríu í Olísdeildinni. Liðið er án þjálfara og æfingahúsnæðis auk þess sem ekki hefur verið víst að allir lykilmenn liðsins ætluðu að vera áfram með. M.a. var Sigurður Ingiberg Ólafsson, markvörður, leigður frá ÍR á síðasta tímabili og ekki hefur verið gengið frá áframhaldandi leigusamningi.
Heimildir handbolta.is herma ennfremur að Sigurður Ingiberg og Kristján Orri Jóhannsson, markahæsti leikmaður Grill66-deildarinnar á síðasta keppnistímabili, hafi tekið stefnuna á ÍR sem leika mun í Grill66-deildinni. Sigurður er samningsbundinn Breiðholtsliðinu næsta árið eins og kom fram hjá handbolta.is á dögunum.
Aðeins eru fjögur ár síðan KR dró lið sitt úr keppni eftir að það vann sér sæti í Olísdeild karla. Þá tók Víkingur sæti KR-inga og enn kemur það í hlut Víkinga að vera til taks.
