Leikmenn Kríu fagna þegar sæti í Olísdeildinni var í höfn. Mynd/Eyjólfur Garðarsson

Óvíst er hvort nýliðar Olísdeildar karla, lið Kríu, æfi og leiki heimaleiki sína í íþróttahúsinu á Seltjarnarnesi, sem gengur undir heitinu Hetzhöllin, á næsta keppnistímabili. Þetta hefur handbolti.is samkvæmt heimildum og að Kríumenn horfi í kringum sig eftir nýjum samastað til að hreiðra um sig áður en átökin í Olísdeildinni hefjast.


Þótt Kríumenn leggi ekki megin áherslu á að æfa sem oftast er ljóst að einhverstaðar verða þeir að eiga samastað til lágmarksæfinga og heimaleikja í Olísdeildinni.


Kría lék heimaleiki sína í Hertzhöllinni á nýliðinni leiktíð auk þess sem liðið fékk tíma þar til æfinga enda eiga nokkrir leikmenn liðsins rætur að rekja til Seltjarnarness.


Þröng er á þingi í Hertzhöllinni af jákvæðum ástæðum. Fjölgað hefur í flokkum hjá Gróttu og m.a. er svo komið að félagið sendir ungmennalið karla til keppni í 2. deild á næsta keppnistímabili eins og kom m.a. fram í yfirliti yfir væntanleg keppnislið á Íslandsmótinu sem handbolti.is greindi frá í dag. Grótta verður þar af leiðandi með þrjú meistaraflokkslið auk yngri flokka. Þar með þrengir að öðrum þeim sem æfa og keppa í Hertzhöllinni.


Viðræður hafa átt sér stað á milli forsvarsmanna Gróttu og Kríu um lausn eftir því sem handbolti.is hefur hlerað en ekkert hefur frést af því hvort viðræðurnar hafi leitt til niðurstöðu.


Hent hefur verið þeirri hugmynd á loft að Kría leiki heimaleiki sína í Olísdeildinni í Fylkishöllinni á Árbæ, hvort sem það var gert í gamni eða alvöru.

- Auglýsing -

Nýjustu fréttir

- Auglýsing -