- Auglýsing -
Kvennalandslið Íslands í handknattleik mætir landsliði Ísrael í 1. umferð umspils um sæti á heimsmeistaramótinu sem fram fer síðla á næsta ári í Danmörku, Svíþjóð og í Noregi. Dregið var í umspilið í morgun. Fyrri viðureignin verður 2. eða 3. nóvember hér á landi en síðari leikurinn á heimavelli ísraelska landsliðsins 5. eða 6. nóvember.
Sigurliðið kemst á síðara stig umspilsins sem leikið verður næsta vor. Þá blandast í hópinn með sigurliðunum níu um umspilinu í nóvember tíu lið frá Evrópumótinu sem haldið verður í nóvember á þessu ári. Einnig slæst landslið Tékklands í hópinn en það sat yfir þegar dregið var í morgun.
Átján lið voru í skálunum tveimur sem dregið var úr í morgun. Ísland var í efri styrkleikaflokki.
Eftirtaldar þjóðir drógust saman:
Ísland – Ísrael.
Aserbadsjan – Portúgal.
Færeyjar – Kósovó.
Slóvakía – Lettland.
Grikkland – Bosnía Hersegóvína.
Úkraína – Lúxemborg.
Búlgaría – Ítalía.
Austurríki – Finnland.
Bretland – Tyrkland.
- Auglýsing -
