Maksim Akbachev tekur við sem yfirþjálfari Gróttu. Mynd/Egill Bjarni Friðjónsson

Maksim Akbachev hefur verið ráðinn yfirþjálfari Gróttu til næstu tveggja ára. Hann tekur við af Hákon Bridde sem á dögunum var ráðinn í sambærilegt starf hjá uppeldisfélagi sínu, HK. Maksim er ætlað að leiða uppbyggingu handboltans í Gróttu, í samvinnu við stjórn og aðra þjálfara, eins og segir í tilkynningu frá Handknattleiksdeild Gróttu.


Maksim gekk til liðs við Gróttu árið 2020 þegar hann hóf að þjálfa 4. flokk karla og kvenna. Auk þess hefur hann verið aðstoðarþjálfari meistaraflokks karla undanfarið ár og sinnti afreksæfingum hjá félaginu.


Þjálfaraferil sinn hóf Maksim hjá Val en hann er barnabarn hins þekkta þjálfara Boris Akbachev sem með störfum sínum hefur markaði djúp spor í íslenskan handknattleik um langt árabil.

Árin 2017-2019 þjálfaði Maksim hjá Haukum þar sem hann var aðstoðarþjálfari meistaraflokks karla og stýrði einnig ungmennaliði félagsins í Grill-66 deildinni. Maksim hefur einnig komið að þjálfun yngri landsliða Íslands og stýrði meðal annars U-17 ára landsliðinu í tvö ár.

- Auglýsing -

Nýjustu fréttir

- Auglýsing -