Hluti meistaraliðsins bíður eftir flugi á Keflavíkurflugvelli í kvöld. Framundan er langt og strangt ferðalag til Kósovó. Mynd/Aðsend

Íslands- og bikarmeistarar KA/Þórs eru á leið í loftið frá Íslandi um miðnætti áleiðis til Istogu Kósovó þar sem liðið leikur á föstudag og laugardag við Istogu í annarri umferð Evrópubikarkeppninnar í handknattleik. Fyrsti áfangi ferðarinnar er að baki, ferð frá Akureyri til Keflavíkur.


Þegar þetta er ritað á tólfta tímanum að kveldi 12. október bíður meistaraliðið eftir að komast í flug til Varsjár í Póllandi þaðan sem flogið verður áfram til Skopje í Norður Makedóníu. Frá Skopje fer hópurinn með langferðabifreið til Istogu í Kósovó. Reiknað er með að komið verði á leiðarenda klukkan 14 að staðartíma á morgun, um sólarhring eftir að lagt var af stað frá Akureyri.

Martha Hermannsdóttir, Rut Arnfjörð Jónsdóttir og Rakel Sara Elvarsdóttir glaðar í bragði bíða eftir brottför til Varsjár. Mynd/Aðsend


Svipað ferðalag tekur við á heimaferðinni, eins og gefur að skilja.
KA/Þór hefur aldrei fyrr tekið þátt í Evrópukeppni í handknattleik. Til stóð að liðið spreytti sig á síðasta ári en ekkert varð úr vegna veirunnar.

Sem fyrr segir fara leikirnir fram á föstudag og á laugardag og hefur handbolti.is í hyggju að fylgjast með leikjunum eftir því mögulegt verður. Báða daga verður flautað til leiks í Istogu klukkan 16, að íslenskum tíma.

Andri Snær Stefánsson meistaraþjálfari t.v. og Siguróli Sigurðsson fararstjóri. Mynd/Aðsend
- Auglýsing -

Nýjustu fréttir

- Auglýsing -