Mörðu sigur í fyrstu viðureign

Mynd/Egill Bjarni Friðjónsson

ÍR marði FH, 28:27, í fyrsta leik liðanna í undanúrslitum í umspili um sæti í Olísdeild kvenna í kvöld en leikið var í Austurbergi. FH átti þess kost að jafna metin undir lokin en tókst óhönduglega til með síðustu sóknina. Boltinn tapaðist um 10 sekúndum fyrir leikslok áður en hægt var að koma skoti á mark ÍR.


Næsta viðureign verður í Kaplakrika á sunnudaginn og hefst hún klukkan 19.30.


FH-liðið var mun sterkara fram eftir öllum leiknum. Góð byrjun færði liðinu þriggja marka forskot eftir 10 mínútur, 5:2. Enn var þriggja marka munur, FH í hag, að loknum fyrri hálfleik, 15:12.


Varnarleikur ÍR þéttist þegar kom fram í síðari hálfleik. Eftir um tíu mínútur var staðan orðin jöfn, 19:19. ÍR-ingar skriðu fram úr og voru með vænlega stöðu, 26:23 og 27:24, þegar rúmar fimm mínútur voru til leiksloka.


Mark eftir hraðaupphlaup var dæmt af FH í stöðunni, 27:26, fyrir ÍR enda var lína á sóknarmann FH sem skoraði. ÍR komst tveimur mörkum yfir, 28:26, þegar hálf önnur mínúta var til leiksloka. FH lánaðist að skora 27. markið en nær komst liðið ekki.


FH verður að vinna heimaleikinn á sunnudagskvöld til þess að knýja út oddaleik í Austurbergi á miðvikudagskvöld.


Mörk ÍR: Karen Tinna Demian 11, Hildur María Leifsdóttir 4, Fanney Ösp Finnsdóttir 3, Theodóra Sveinsdóttir 3, Anna María Aðalsteinsdóttir 2, Dagbjört Ýr Ólafsdóttir 1, Matthildur Lilja Jónsdóttir 1, Laufey Lára Höskuldsdóttir 1, Sylvía Jónsdóttir 1, Isabella Schöbel Björnsdóttir 1.

Mörk FH: Fanney Þóra Þórsdóttir 8, Hildur Guðjónsdóttir 7, Emma Havin Sardarsdóttir 4, Sigrún Jóhannsdóttir 3, Ragnhildur Edda Þórðardóttir 2, Emilía Ósk Steinarsdóttir 2, Ivana Meincke 1.

- Auglýsing -

Nýjustu fréttir

- Auglýsing -