Óðinn Þór Ríkharðsson í leik með TTH á leiktíðinni. Mynd/TTH Holstebro

Örvhenti hornamaðurinn Óðinn Þór Ríkharðsson sem nú leikur með Team Tvis Holstebro í Danmörku er á heimleið eftir tímabilið og mun að öllum líkindum ganga til liðs við KA samkvæmt heimildum handbolta.is. Óðinn Þór hefur átt í viðræðum við Akureyrarliðið og mun samningur liggja á borði beggja.


Óðinn Þór hefur leikið í Danmörku í þrjú ár. Fyrst í tvö ár með GOG á Fjóni en verið í herbúðum Holstebro í vetur en liðið er í þriðja sæti dönsku úrvalsdeildarinnar.


Áður en Óðinn Þór fór til Danmerkur lék hann með HK, Fram og FH hér heima. Óðinn Þór, sem er 23 ára gamall, á að baki 14 landsleiki sem hann hefur skoraði í 44 mörk. Síðast var Óðinn Þór í landsliðinu sem mætti Litháen í undankeppni EM í Laugardalshöll í byrjun nóvember. Skoraði hann þá tvö mörk eftir að hafa leyst af Arnór Þór Gunnarsson á endaspretti leiksins. Einnig kom hann á endasprettinum inn í íslenska landsliðið á HM í Þýskalandi fyrir tveimur árum.

Heimildir handbolta.is herma ennfremur að Óðni Þór hafi staðið til boða að leika áfram í Danmörku en hafi valið fremur að koma heim í sumar.

- Auglýsing -

Nýjustu fréttir

- Auglýsing -