Ólafur fór hamförum

Íslendingaliðið IFK Kristianstad hóf keppni í sænsku úrvalsdeildinni í handknattleik karla í dag með mikilvægum sigri á HK Malmö, 26:24. Leikið var í Baltiska-íþróttahöllinni í Malmö. Íslensku landsliðsmennirnir í liði IFK voru í stórum hlutverkum að vanda.

Segja má að Hafnfirðingurinn Ólafur Andrés Guðmundsson hafi farið hamförum. Hann var besti leikmaður vallarins og raðaði inn mörkum og voru þau alls níu áður en leikurinn var úti. Ólafur er fyrirliði liðsins.

Teitur Örn Einarsson skoraði tvö mörk með þrumufleygum.

Eftir jafnan leik lengst af þá náði IFK þriggja marka forskoti, 24:21, þegar rúmar sex mínútur voru til leiksloka. Leikmenn Malmö náðu aldrei að brúa bilið og leikmenn IFK fögnuðu góðum sigri í upphafi keppnistímabilsins.