Ólafur kveður Montpellier

Ólafur Andrés Guðmundsson. Mynd/Hafliði Breiðfjörð

Ólafur Andrés Guðmundsson leikur ekki með franska liðinu Montpellier á næstu leiktíð. Hann er einn fjögurra leikmanna sem kvaddi félagið eftir síðasta leik þess í frönsku 1. deildinni í síðustu viku sem fram fór á heimavelli.


Hinir eru Marin Sego, Benjamin Bataille og Gilberto Duarte. Frá þessu er greint á heimasíðu Montpellier.


Ólafur Andrés gekk til liðs við Montpellier á síðasta sumri frá Kristianstad í Svíþjóð. Meiðsli settu stórt strik í reikinginn hjá Hafnfirðingnum á keppnistímabilinu. Hann var m.a. alveg frá keppni eftir að franska deildarkeppnin hófst á ný eftir Evrópumeistaramót landsliða í byrjun febrúar. Ólafur Andrés tók þátt í fjórum af átta leikjum íslenska landsliðsins á EM og var í hópi margra leikmanna sem smitaðist af kórónuveirunni á mótinu.


Handbolti.is hefur ekki upplýsingar hvað tekur við hjá Ólafi Andrési sem hefur leikið sem atvinnumaður í Danmörku, Svíþjóð, Þýskalandi og í Frakklandi í ríflega áratug.

Montpellier hafnaði í fjórða sæti frönsku 1. deildarinnar á nýliðinni leiktíð og féll úr keppni í átta liða úrslitum Meistaradeildar Evrópu.

- Auglýsing -

Nýjustu fréttir

- Auglýsing -