Óvissa eftir höfuðhögg

Írena Björk Ómarsdóttir markvörður gekk til liðs við FH í sumar. Mynd/Facebooksíða FH

Írena Björk Ómarsdóttir, markvörður, hefur enn ekki getað leikið með FH á þessari leiktíð í Olísdeildinni. Ástæðan er höfuðhögg sem hún fékk nokkrum dögum fyrir fyrsta leik FH í Olísdeildinni í fyrri hluta þessa mánaðar.

Jakob Lárusson, þjálfari FH, segir óvíst hvenær Írena Björk verður reiðubúin að leika með FH-liðinu. Hún fái að sjálfsögðu allan þann tíma sem þarf til þess að jafna sig.

Írena Björk gekk til liðs við FH í sumar frá Stjörnunni. Til þess að fylla skarð hennar fékk FH markvörðinn Margréti Einarsdóttur að láni frá Val.
Írena Björk er enn einn markvörðurinn sem glímir við afleiðingar höfuðhöggs. Landsliðsmarkvörðurinn Hafdís Renötudóttir er á batavegi eftir að hafa fengið boltann í höfuðið. Hún mun vera á batavegi og verður hugsanlega með Fram í næstu umferð Olísdeildar samkvæmt því sem kom fram á Facebook-síðu Fram um helgina. Þá var skotið í höfuðið á Heiðrúnu Dís Magnúsdóttur, markverði Stjörnunnar, í viðureign KA/Þórs og Stjörnunnar á síðasta laugardag.

Fyrir tveimur árum varð landsliðsmarkvörðurinn Guðrún Ósk Maríasdóttir að hætta eftir að hafa orðið fyrir þungu höfuðhöggi í leik í Olísdeildinni. Dæmin af markvörðum eru vafalaust fleiri.

- Auglýsing -

Nýjustu fréttir

- Auglýsing -