Ari Magnús Þorgeirsson hefur klæðst búningi FH á nýja leik eftir sjö ár í búningi Stjörnunnar. Mynd/FH

Örvhenta skyttan Ari Magnús Þorgeirsson hefur skrifað undir samning við handknattleiksdeild FH.

Ari Magnús lagði skóna á hilluna í sumar en síðastliðin tímabil hefur hann leikið með liði Stjörnunnar við góðan orðstír. Hann er öllum hnútum kunnugur í Kaplakrika enda uppalinn í félaginu og varð m.a. Íslandsmeistari með liði FH 2011. Ari Magnús spilaði síðast með FH tímabilið 2012-2013.

Áður en Ari ákvað að ganga til liðs við FH höfðu ÍR og Afturelding sýnt honum áhuga en römm er sú taug er rekka dregur föðurtúna til.

„Við FH-ingar erum virkilega ánægðir með að fá Ara heim í FH. Ari mun styrkja okkur mikið hægra megin á vellinum en hann virkilega öflugur og þrautreyndur leikmaður” sagði Sigurgeir Árni Ægisson, framkvæmdastjóri handknattleiksdeildar FH í fréttatilkynningu. „Það verður frábært að sjá Ara í svörtu og hvítu á nýjan leik, það eru hans litir,“ sagði Sigurgeir Árni ennfremur í fyrrgreindri tilkynningu.

- Auglýsing -

Nýjustu fréttir

- Auglýsing -