Christian Berge, þjálfari norska karlalandsliðsins í handknattleik, fær ekki að þjálfa félagslið á sama tíma og hann er landsliðsþjálfari Noregs. Forráðamenn norska handknattleikssambandsins hafa sett Berge stólinn fyrir dyrnar.
Berge hefur verið sterklega orðaður við þjálfun úrvalsdeildarliðsins Kolstad en stjórnendur félagsins hafa uppi háleit áform um að búa til stórlið sem á næstu árum skal velgja bestu félagsliðum Evrópu undir uggum. Liðið á að verða skipað stórstjörnum, flestum norskum en einnig leikmönnum frá öðrum Norðurlandanna.
Á dögunum var frá því greint í TV2 í Noregi að forráðamenn Kolstad hafi nöfn Janusar Daða Smárasonar og Sigvalda Björns Guðjónssonar á óskalista sínum. Þá munu Kolstadmenn einnig renna hýru auga til Sander Sagosen, norsku stjórstjörnunnar sem leikur nú með Kiel.
Berge og forráðamenn Kolstad hafa gert sér vonir um að fá leyfi frá norska handknattleikssambandinu til þess að hafa Berge við stjórnvölinn. Berge er með saming um þjálfun norska karlalandsliðsins til ársins 2025.
„Við erum ánægðir með háleit áform stjórnenda Kolstad en við viljum hinsvegar að Berge verði í fullu starfi með norska landsliðið,“ hefur TV2 í Noregi eftir Geir Lio, formanni norska handknattleikssambandsins.
Berge virðir ákvörðun stjórnenda sambandsins.
