Stöndum saman – nema þegar það hentar ekki

• Mjög hefur verið lögð áhersla á samstöðu þjóðarinnar í baráttu hennar við kórónuveiruna allt frá því að hún stakk sér niður hér snemma árs. Saman förum við í gegnum þetta, aðeins með samstilltu átaki vinnum við bug á þessum vágesti. Leggjumst öll á árar. Sameinuð sýndum við í vor að okkur eru allir vegir færir. Við erum öll almannavarnir. Fleiri kunnuglegir tónar hafa hljómað upp á síðkastið.

• Ekkert er nema gott um það segja enda nauðsynlegt að þjóðin standi saman sem eitt þegar vá ber að dyrum. Sennilega er aldrei of oft hamrað á þeirri staðreynd.
  
• Á þá ekki jafnt yfir alla að ganga? Eiga ekki ráðamenn að haga reglum sínum og tilskipunum sínum með þeim hætti?
  
• Óveðurský veirunnar hafa hrannast upp á höfuðborgarsvæðinu um nokkurt skeið. Ákveðið var að spyrna við fótum um helgina og aftur í gærkvöld var íbúum höfuðborgarsvæðisins gert, frá og með deginum í dag, að stíga af enn meiri krafti en áður á hemlana. Sannarlega ekki að ástæðulausu enda hafa alltof margir fremur gælt við bensíngjöfina en hemlana síðustu vikur.
  
• Meðal hugmynda sóttvarnalæknis í minnisblaði til heilbrigðisráðherra í gær segir í 7. lið.: „Mælst er til að öllu keppnistarfi í íþróttum verði frestað um 2 vikur.“
  
• Sem sagt engar undantekningar. Eitt skal yfir alla ganga. Tek undir það heilshugar.
  
• Heilbrigðisráðherra kaus að rjúfa samstöðuna innan íþróttahreyfingarinnar með því að heimila keppni og æfingar í íþróttum utandyra, þar undir fellur knattspyrna. Öllum eldri en 15 ára og búa á skilgreindu höfuðborgarsvæði ráðuneytisins er óheimilt að æfa og keppa innandyra.
  
• Þeir sem æfa sund utandyra geta það reyndar ekki vegna þess að sundlaugum hefur verið lokað.
  
• Áfram veður keppt og æft í fótbolta meðan íþróttamenn í flestum öðru íþróttum mega vart hittast á förnum vegi, hvað þá meira. Og þó. Reyndar gætu þeir farið saman á fótboltaleiki, setið hlið við hlið í merktum sætum, tuttugu saman í hólfi og verið með grímur.
  
• Áfram ferðast fótboltamenn af höfuðborgarsvæðinu út á land og þeir sem búa utan höfuðborgarsvæðisins verða að koma í bæinn til að glíma við höfuðborgarliðin. Dómarar verða á faraldsfæti út og inn af höfuðborgarsvæðinu. Á sama tíma er mælst til þess að íbúar höfuðborgarinnar fari ekki að nauðsynjalausu út fyrir mörk þeirra bæja sem tilheyra höfuðborgarsvæðinu samkvæmt reglugerð ráðherra.
  
• Hversvegna stóð ráðherra ekki í lappirnar? Af hverju kaus ráðherra að rjúfa samstöðuna? Getur verið að það sé vegna milljón dollara leiksins sem fram fer á Laugardalsvelli annað kvöld?
  
• Við erum öll almannavarnir – nema þegar það hentar ekki.

Ívar Benediktsson, ivar@handbolti.is