Stórleikur Elvars Arnar nægði ekki

Elvar Örn Jónsson í leik með Skjern. Mynd/Skjern

Stórleikur Elvars Arnar Jónsson dugði Skjern ekki til þess að leggja Danmerkurmeistara Aalborg Håndbold á heimavelli í dönsku úrvalsdeildinni. Eftir æsispennandi leik sem var jafn nánast frá upphafi til enda voru það leikmenn Álaborgarliðsins sem fóru með stigin tvö heim í farteskinu, lokatölur 30:28. Aðeins munaði einu marki á liðunum að loknum fyrri hálfleik, 15:14, fyrir Aalborg-liðið þar sem Arnór Atlason er aðstoðarþjálfari.

Elvar Örn skoraði sjö mörk í átta skotum og var markahæsti leikmaður Skjern. Hann átti einnig eina stoðsendingu og var einu sinni vísað af leikvelli í tvær mínútur.

Leikurinn var opinn allt þar til lokin að Sebastian Barthold skoraði 30. mark Aalborg fjórum sekúndum fyrir leikslok. Þá hafði Álaborgarliðið m.a. átt stangarskot nokkru áður en verið svo lánsamt að ná frákastinu.

Aalborg er efst með 19 stig eftir 11 leiki. GOG er stigi og leik á eftir. Skjern er í sjötta sæti með 13 stig eftir 10 leiki.

Staðan í dönsku úrvalsdeildinni.

- Auglýsing -

Nýjustu fréttir

- Auglýsing -