Það er sprengja í töskunni!

Einum af þjálfurum sænska 18 ára landsliðsins í handknattleik varð heldur betur hált á svellinu er hann fór í gegnum vopnaeftirlit á Kastrupflugvelli við Kaupmannahöfn í dag. Þegar tollvörður spurði við hefðbundið eftirlit hvað væri í handtösku þjálfarans svaraði hann að sprengja væri í töskunni.


Eins og nærri má geta varð uppi fótur og fit enda svörum þessum alls ekki tekið af léttúð á flugvöllum eins og nærri má geta. Mun þjálfarinn, sem ekki hefur verið nafngreindur í sænskum fjölmiðlum, hafa slegið svari sínu fram í gamni.


Þjálfarinn var handtekinn og ríflega klukkustundar seinkun varð á brottför áætlunarvélarinnar frá Kastrup til Skopje í Norður Makedóníu meðan innritaður farangur hans var fjarlægður úr vélinni.


Sænska landsliðið mætir því íslenska í fyrstu umferð heimsmeistaramóts kvenna á morgun. Ljóst er að uppákoman, sem er öll hin ömurlegasta, sló sænska hópinn svo sannarlega út af laginu.


Eins og gefur að skilja fór þjálfarinn ekki með liðinu til Skopje og má telja víst að hann hafi lokið störfum fyrir sænska handknattleikssambandið.


Danska lögreglan sagði í kvöld að manninum hafi verið sleppt að lokinni yfirheyrslu en að hann eigi von á að verða kærður fyrir athæfið vegna brots á hryðjuverkalögum.

- Auglýsing -

Nýjustu fréttir

- Auglýsing -