Það skal leika að nýju

Stjarnan sækir KA/Þór heim í dag í Olísdeildinni. Mynd/Egill Bjarni Friðjónsson

Ekki verður hjá því komist að viðureign Stjörnunnar og KA/Þórs í Olísdeild kvenna verði leikin að nýju. Endurnýjaður Áfrjýjunardómstóll Handknattleikssambands Íslands komst að sömu niðurstöðu í málinu og sá fyrri, þ.e. að leikurinn skuli fara fram á ný. Þetta hefur Akureyri.net samkvæmt heimildum.

Handbolti.is hefur fengið staðfest samkvæmt heimildum eftir að frétt Akureyri.net  birtist að niðurstaða Áfrýjunardómstólsins sé eins og að ofan segir.

Kröfu varnaraðila málsins, Kvennaráðs KA/Þórs, um frávísun málsins var hafnað. Krafan sneri að greiðslu ferðakostnaðar, að uppihaldi, gistingu og málskostnaði.

Aðalkröfu  áfrýjanda, Handknattleiksdeild Stjörnunnar, um að úrslit leiksins á milli Stjörnunnar og KA/Þórs í Olísdeild kvenna, sem fram fór 13. febrúar 2021, verði leiðrétt og þau ákveðin 26:26, var einnig hafnað.

„Leikur Stjörnunnar og KA/Þórs í Olísdeild kvenna sem fram fór 13. febrúar 2021 skal leikinn aftur,“ segir í dómsorði sem handbolti.is hefur undir höndum.

Dóminn  kváðu upp Guðjón St. Marteinsson, Eiríkur Elís Þorláksson og Þorsteinn Einarsson.

Eftir því sem handbolti.is hefur hlerað stendur til að leikurinn fari fram fljótlega eftir að landsliðsmenn Stjörnunnar og KA/Þórs verða lausir úr sóttkví eftir ferð með landsliðinu til Slóveníu sem stendur fyrir dyrum. Hugsanlega fer leikurinn fram þriðjudaginn 27. apríl.

Uppfært kl. 13.30 – Dómurinn var birtur á heimasíðu HSÍ upp úr klukkan 13 í dag. Hér er hlekkur á dóminn.

- Auglýsing -

Nýjustu fréttir

- Auglýsing -