- Auglýsing -
Það eru 21 ár síðan Magdeburg varð síðast Þýskalandsmeistari, undir stjórn Alfreðs Gíslasonar, 2001. Ólafur Stefánsson var þá í aðalhlutverki í liðinu. Ómar Ingi Magnússon og Gísli Þorgeir Kristjánsson léku það eftir í gærkvöldi, þegar Magdeburg var meistari 2022 með því að leggja Balingen-Weistetten að velli í Magdeburg, 31:26. Ómar Ingi fór á kostum á lokasprettinum og skoraði 6 mörk eins og Gísli Þorgeir.
Síðan Alfreð hætti hjá Magdeburg 2006 og fór til Kiel, hafa komið 9 þjálfarar við sögu. Þjálfari liðsins er nú Bennet (Benno) Wiegert, sem fæddist í Magdeburg 25. janúar 1982. Benno, sem hefur leikið fimm landsleiki fyrir Þýskaland, var leikmaður Magdeburgar-liðsins er það var síðast meistari, 2001.
Wiegert tók við þjálfun liðsins af Geir Sveinssyni, er Geir var látinn taka poka sinn í desember 2015. Benno var þá aðstoðarþjálfari Geirs.
Geir var áttundi þjálfari Magdeburg á níu árum frá því að Alfreð hætti, eða á tímabilinu 2006-2015.
Benno kynntist handknattleik í gegnum föður sinn Ingolf Wiegert, sem var einn af lykilmönnum landsliðs A-Þýskalands, sem varð Ólympíumeistari 1980 í Moskvu og þá varð hann margfaldur meistari með Magdeburg. Benno hefur sagt, að mestu þekkingu hans á handknattleik hafi hann fengið frá pabba sínum og síðan Alfreð, er hann þjálfaði hann hjá Magdeburg.
- Auglýsing -
