Undirbúningur að byggingu fjölnota þjóðarhallar m.a. fyrir íþróttir í Þórshöfn í Færeyjum er kominn á fullan skrið. Fjármögnun er í höfn og er áformað að keppnishöllin verði opnuð undir lok næsta árs. Þetta staðfestir Heðin Mortensen borgastjóri í Þórshöfn í samtali við vef Kringvarpsins, ríkisjónvarps Færeyja.
Áætlaður kostnaður við byggingu þjóðarhallarinnar í Hoyvík við Þórshöfn eru 243 milljónir færeyskra króna eða jafnvirði liðlega 4,6 milljörðum íslenskra. Af því mun borgarsjóður Þórshafnar leggja fram 134 milljónir færeyskra. Það sem út af borðinu stendur kemur úr landssjóðum Færeyja og Danmerkur og frá einkaaðilum. Upphaflegar áætalnir gerðu ráð fyrir að kostnaður yrði 218 milljónir færeyskra króna, ríflega fjórir milljarðar íslenskra.
Byggingakostnaður hefur mjakast upp frá fyrri áætlunum m.a. vegna hækkunar á byggingarefni á síðustu mánuðum. Verði enn meiri hækkanir á næstu mánuðum áskilja framkvæmdaaðilar sér rétt til að draga úr byggingahraða. Mortensen borgarstjóri vonast til þess að svo verði ekki. Borgarsjóður Þórshafnar samþykkti á dögunum að hækka framlag sitt til framkvæmdanna um 25 milljónir, sem nemur liðlega 460 milljónum íslenskra.
Keppnishöllin á að rúma 2.700 áhorfendur í sæti og 4.600 á standandi viðburðum s.s. tónleikum. Auk kappleikja og tónleika er gert ráð fyrir að húsið verði leigt út til ráðstefnu- og fundarhalds.
Keppnishöllin verður m.a. gjaldgeng til alþjóðlegrar keppni í handknattleik, körfuknattleik og blaki auk þess sem fleiri íþróttagreinar munu eiga athvarf í höllinni til keppni og æfinga. Um byltingu verður að ræða í aðstöðumálum landsliða Færeyja í innanhússíþróttum. Nýja höllin mun leysa af hólmi Høllina á Hálsi sem er barn síns tíma.
