Íslenska landsliðið í handknattleik kvenna, skipað leikmönnum 18 ára og yngri, vann stórsigur á Alsír, 42:18, í þriðju og síðustu umferð riðlakeppni heimsmeistaramótsins í Skopje í dag. Þar með er íslenska liðið öruggt um sæti í 16-liða úrslitum keppninnar og leikur við Norður Makedóníu og Íran á morgun og á föstudag um sæti í átta liða úrslitum mótsins.
Eins og tölurnar gefa til kynna var gríðarlegur munur á liðunum að þessu sinni. Íslensku stúlkurnar gáfu tóninn strax í upphafi með því að skora 13 af 14 fyrstu mörkum leiksins. Eftir það var aldrei vafi um hvort liðið færi með sigur úr býtum. Ísland var 15 mörkum yfir að loknum fyrri hálfleik, 23:8.
Mjög vel tókst að dreifa álaginu á milli leikmanna íslenska landsliðsins. Fengu þær sem höfðu leikið hvað minnst í keppninni til þessa góðan tíma til að stimpla sig inn í mótið sem er jákvætt fyrir framhaldið.
Síðar í kvöld kemur í ljós hvort það verða Svíar eða Svartfellingar sem fylgja íslenska landsliðinu eftir í sextán liða úrslit og í milliriðil með Íran og Norður Makedóníu. Ef Svartfellingar skríða áfram með íslenska liðinu tekur hvort lið með sér eitt stig en ef Svíar vinna Svartfellinga í kvöld fara þeir áfram með íslenska liðinu sem tekur þá með sér tvö stig í milliriðla sem er afar mikilvægt.
Mörk Íslands: Lilja Ágústsdóttir 6, Sonja Lind Sigsteinsdóttir 6, Elín Klara Þorkelsdóttir 5, Hildur Lilja Jónsdóttir 5, Embla Steindórsdóttir 4, Rakel Oddný Guðmundsdóttir 4, Brynja Katrín Benediktsdóttir 3, Inga Dís Jóhannsdóttir 3, Alfa Brá Hagalín Oddsdóttir 2, Tinna Sigurrós Traustadóttir 2, Thelma Melsteð Björgvinsdóttir 2.
Varin skot: Ingunn María Brynjarsdóttir varði amk 10 skot, Ethel Gyða Bjarnasen varði amk 9 skot.
Handbolti.is fylgdist með leiknum í textalýsingu hér fyrir neðan.
