Uppselt á heimaleikinn við Austurríki

Mynd/Hafliði Breiðfjörð

Uppselt er á landsleik Íslands og Austurríkis í undankeppni heimsmeistaramóts karla sem fram fer á Ásvöllum á laugardaginn. Síðustu miðarnir seldust í gærkvöld eftir sem fram kemur í tilkynningu frá HSÍ.


Ljóst er að troðfullt hús og rífandi góð stemning verður á leiknum á laugardaginn. „Áhuginn kemur ekki á óvart eftir frábært gengi landsliðsins á EM í janúar sl. og langt er síðan strákarnir okkar léku hér heima með áhorfendur í stúkunni,“ segir m.a. í tilkynningu frá HSÍ.


Eftir því sem handbolti.is kemst næst verða nokkuð innan við 2.000 áhorfendur á leiknum.


Ljóst er að mögulegt væri að selja töluvert fleiri miða á leikinn ef húsrúm leyfði. Laugardalshöll er í uppnámi nú sem fyrr og bygging þjóðarhallar hefur rekið á reiðanum áratugum saman.


Fyrri viðureign Íslands og Austurríkis fer fram í Bregenz í Austurríki á miðvikudaginn. Samanlögð úrslit leikjanna tveggja ræður því hvort Ísland eða Austurríki öðlast keppnisrétt á HM sem fram fer í Svíþjóð og Póllandi í janúar.

- Auglýsing -

Nýjustu fréttir

- Auglýsing -