Fjölnismenn töpuðu fyrir ungmennaliði Vals í hörkuleik í Dalhúsum í kvöld, 30:29, er liðin leiddu saman hesta sína í Grill 66-deild karla í handknattleik. Ungmennalið Vals komst þar með upp að hlið Víkings í efsta sæti með 14 stig eftir níu leiki. Fjölnir er í sætinu fyrir neðan ásamt HK með 12 stig. Víkingur hefur 14 stig en á átta leiki að baki og mætir Herði í Víkinni klukkan 15 á morgun.
Fjölnismenn voru sterkari framan af leik í kvöld. Þeir höfðu m.a. fjögurra marka forskot þegar flautað var til loka fyrri hálfleiks, 15:11. Valsmenn sóttu í sig veðrið í síðari hálfleik eins og úrslitin gefa til kynna.
Mörk Fjölnis: Brynjar Óli Kristjánsson 7, Elvar Otri Hjálmarsson 7, Viktor Berg Grétarsson 4, Goði Ingvar Sveinsson 3, Óðinn Freyr Heiðmarsson 2, Alex Máni Oddnýjarson 2, Aron Ingi Heiðmarsson 2, Ísak Örn Guðbjörnsson 1, Jón Bald Freysson 1.
Mörk Vals U.: Benedikt Gunnar Óskarsson 9, Róbert Nökkvi Petersen 7, Einar Þorsteinn Ólafsson 6, Andri Finnsson 3, Jóel Bernburg 2, Breki Hrafn Valdimarsson 2, Þorgeir Arnarsson 1.
