Víkingur fer áfram – hetjulegri baráttu Harðar lokið

Leikmenn Víkings og Harðar hafa háð skemmtilegt einvígi um undanúrslitum umspilsins. Mynd/Víkingur

Víkingur er kominn í úrslitarimmu um sæti í Olísdeild karla eftir að hafa lagt Hörð frá Ísafirði í oddaleik í Víkinni í kvöld, 39:32. Víkingar mæta þar með annað hvort Fjölni eða Kríu í úrslitum um sæti í Olísdeildinni en liðin mætast í Dalhúsum síðar í kvöld, einnig í oddaleik.


Harðarmenn eru þar með úr leik eftir hetjulega baráttu en liðið hefur sett skemmtilegan svip á umspilið. Sigur í heimaleiknum á laugardaginn og tap í tvíframlengdri viðureign í Víkinni í síðustu viku þar sem Harðarmenn voru afar óheppnir að vinna ekki áður en þeim þvarr kraftur í síðari framlengingu.

Í dag héldu leikmenn Harðar í við Víkinga í rúmlega 50 mínútur áður en þreytan bankaði upp á með þeim afleiðingum að mörg góð færi fóru forgörðum.

Víst má telja að lið Harðar mæti tvíefldir til leiks á næsta ári reynslunni ríkari eftir sitt fyrsta keppnistímabil í Grill 66-deildinni.


Víkingar voru sterkari í fyrri hálfleik í dag. Harðarmenn léku vörnina framarlega, nánast 3/3 á köflum. Leikmenn Víkings létu það ekki slá sig verulega út af laginu og skoruðu þeir 20 mörk í fyrri hálfleik meðan Hörður gerði 14.


Leikmenn Harðar komu af krafti til leiks eftir hálfleikshléið og jöfnuðu metin. Staðan var 25:25 þegar síðari hálfleikur var hálfnaður og 30:30 þegar um tíu mínútur voru til leiksloka. Eftir það skildu leiðir og Víkingum tókst að nýta styrk sinn á lokakaflanum og tryggja sér sæti í úrslitunum.


Styrmir Sigurðsson og Örn Ingi Bjarkason fóru fyrir Víkingsliðinu að þessu sinni. Reynsla þeirra og yfirvegun reið baggamuninn gegn dugmiklum leikmönnum Harðar og framliggjandi vörn þeirra.


Mörk Víkings: Jóhannes Berg Andrason 8, Arnar Steinn Arnarsson 7, Arnar Gauti Grettissson 6, Hjalti Már Hjaltason 6, Styrmir Sigurðsson 6, Egidijus Mikalonis 2, Sverrir Andrésson 1, Örn Ingi Bjarkason 1, Logi Snædal Jónsson 1, Arnar Huginn Ingason 1.

Mörk Harðar: Raivis Gorbunovs 10, Jón Ómar Gíslason 5, Endijs Kusners 4, Þráinn Ágúst Arnaldsson 4, Guntis Pilpuks 3, Daníel Wale Adeleye 2, Tadeo Ulises Salduna 1, Elías Ari Guðjónsson 1, Óli Björn Vilhjálmsson 1, Sudario Eiður Carneiro 1.

- Auglýsing -

Nýjustu fréttir

- Auglýsing -