- Auglýsing -

Viktor Gísli bikarmeistari

Viktor Gísli Hallgrímsson, markvörður íslenska landsliðsins og danska úrvalsdeildarliðsins GOG á Fjóni. Mynd/EPA

Viktor Gísli Hallgrímsson, landsliðsmarkvörður, varð í dag danskur bikarmeistari í handknattleik með liði sínu, GOG frá Fjóni.

GOG vann Team Tvis Holstebro, TTH, 30:28, í úrslitaleik bikarkeppninnar eftir að hafa verið undir í hálfleik 16:15. Leikurinn var hnífjafn og spennandi frá upphafi til enda.

Óðinn Þór Ríkharðsson leikur með TTH. Honum tókst ekki að skora í leiknum framhjá Viktori Gísla.

Þetta er í tíunda skipti en í fyrsta sinn í 15 ár sem GOG vinnur danska bikarinn í karlaflokki. Liðin er 13 ár síðan GOG vann síðast til gullverðlauna í dönskum handknattleik í karlaflokki en þá vann lið félagsins danska meistaratitilinn.

Um er að ræða bikarkeppnina fyrir leiktíðina 2019/2020. Til stóð að leikið yrði til undanúrslita og úrslita í mars en vegna kórónuveirufaraldursins var leikjunum slegið á frest þar til um þessa helgi. Reyndar stóð til um tíma að fella keppnina niður.

Undanúrslitaleikirnir í gær og úrslitaleikurinn í dag fór fram í Holstebro á Jótlandi.

Leiknum var að ljúka en handbolti.is mun flytja frekari fréttir af frammistöðu Íslendinganna í úrslitaleiknum eftir því sem fregnir berast.

- Auglýsing -
- Auglýsing -

Nýjustu fréttir

- Auglýsing -