Vildi ekki gera illt verra

Sigtryggur Daði Rúnarsson lék ekki með ÍBV vegna meiðsla í sigurleiknum á Val. Ljósmynd/Lübeck-Schwartau

Handknattleiksmaðurinn Sigtryggur Daði Rúnarsson lék ekki með ÍBV gegn Val á laugardaginn. Óvíst er hvort hann verður með Eyjaliðinu á laugardaginn þegar það sækir Þór Akureyri heim í Íþróttahöllina á Akureyri í fjórðu umferð Olísdeildarinnar.

Sigtryggur Daði tognaði í aftanverðu öðru læri í fyrsta leik Olísdeildarinnar með ÍBV og hefur ekki jafnað sig, enda geta meiðsli sem þessi verið afar þrálát og leiðinleg viðureignar.

„Til að gera ekki illt verra var ákveðið að ég tæki ekki þátt í leiknum við Val, sagði Sigtryggur við handbolta.is. Hann bætti við að óvíst væri hvort hann verði með ÍBV gegn sínu gamla félagi, Þór Akureyri, í 4. umferð Olísdeildarinnar á laugardaginn í Íþróttahöllinni á Akureyri.

„Mig langar ekki að missa af leiknum en ég verð að sýna skynsemi þegar kemur að þessari tognun,” sagði Sigtryggir Daði. Hann lék upp yngri flokka Þórs áður en hann flutti út til Þýskalands á táningsaldri með foreldrum sínum og systkinum eins og kom fram í viðtali við Sigtrygg á handbolti.is á dögunum.

Eins og kom fram á handbolta.is í gær verður Ásgeir Snær Vignisson frá um nokkurn tíma eftir að hafa farið úr axlarlið í leiknum við Val á laugardaginn. Þá er örvhenti hornamaðurinn Gabríel Martinez Róbertsson einnig úr leik vegna meiðsla.

- Auglýsing -

Nýjustu fréttir

- Auglýsing -