Vipers vann annað árið í röð – Mørk og Lunde bæta í verðlaunasafnið

Norska meistaraliðið Vipers Kristiansand vann í dag Meistaradeild Evrópu í handknattleik kvenna annað árið í röð. Vipers vann ungverska stórliðið Györ í úrslitaleik í MVM Dome í Búdapest, 33:31, að viðstöddum 15.400 áhorfendum. Aldrei hafa fleiri áhorfendur verið á úrslitaleik Meistaradeildar kvenna í handknattlleik.

Franska liðið Metz vann Esbjerg í leiknum um bronsið, 32:26, í leik sem fram fór á undan úrslitaleiknum.

• Vipers er aðeins fimmta liðið sem tekst að vinna Meistaraeildina tvö ár í röð. Hin liðin eru Hypo, Slagelse, Viborg og Györ.
  
• Györ komst yfir, 10-7, en þá tók við slæmur kafli þegar liðið náði ekki að skora í tæpar tíu mínútur. Það nýttu leikmenn Vipers sér og skoruðu sex mörk í röð og lögðu þar með grunninn að sigrinum.
  
• Samvinna tékknesku leikmannanna hjá Vipers, Markétu Jerábková og Jönu Knedlikovu var góð í leiknum. Þær skoruðu samtals 12 mörk.
  
• Aldrei hafa verið skoruð fleiri mörk í úrslitaleik Meistaradeildar kvenna en að þessu sinni.
  
• Markéta Jerábková var útnefnd besti leikmaður Final4 úrslitahelgarinnar. Hún skoraði 19 mörk í tveimur leikjum.
  
• Isabelle Gulldén miðjumaður Vipers skoraði sex mörk í leiknum og er nú í fjórða sæti yfir flest mörk skoruð í Final4 með 55 mörk, tveimur færri en þær Nycke Groot og Anita Görbicz.
  
• Katrine Lunde og Nora Mørk hafa nú unnið Meistaradeildina sex sinnum og jafna metin við Bojana Popović og Ausra Fridrikas.
  
• Vipers er enn ósigrað í úrslitaleik Meistaradeildar kvenna. Liðið hefur unnið tvisvar sinnum. Györ hefur hins vegar unnið 5 úrslitaleiki og tapað fjórum.
  
  Mörk Györ: Anne Mette Hansen 6, Linn Blohm 5, Viktoria Lukacs 4, Stine Oftedal 3, Veronica Kristiansen 3, Estelle Nze-Minko 3, Crina Pintea 3, Eun Hee Ryu 2, Nadine Schatzl 2.
  Mörk Vipers Kristiansand: Markéta Jerábková 7, Isabelle Gulldén 6, Jana Knedlikova 5, Nora Mørk 4, Sunniva Naes Andersen 3, Lysa Tpchaptchet 3, Ana Debelic 3, Zsuzsanna Tomori 2.

Bronsleikur
Esbjerg 26-32 Metz (12-18)

• Metz spilaði ákveðna 5-1 vörn í leiknum sem virtist koma leikmönnum Esbjerg á óvart. Þeim tókst ekki að skora í tæpar 11 mínútur.
  
• Danska liðið hefur ekki fengið eins mörg mörk á sig í fyrri hálfleik í síðustu 23 leikjum sínum eða frá tapleiknum gegn Metz í október 2020.
  
• Henny Reistad skoraði 10 mörk fyrir Esbjerg. Hún endar því tímabilið með 104 mörk og er fjórði leikmaðurinn sem rýfur 100 marka múrinn á tímabilinu.
  
• Reistad komst líka í sjötta sæti yfir flest mörk skoruð í Final4 úrslitahelginni með 48 mörk í sex leikjum.
  
• Dönsk lið eru enn að bíða eftir sínum fyrsta sigri í Meistaradeildinni eftir að úrslitahelgarfyrirkomulagið var tekið upp. Bæði Midtjylland og Esbjerg hafa hafnað í fjórða sæti í Final4.