Íslands- og deildarmeistarar KA/Þórs í handknattleik kvenna taka þátt í Evrópudeildinni í handknattleik í haust. Erlingur Kristjánsson, formaður kvennaráðs KA/Þórs, staðfesti það við Akureyri.net, fréttmiðil allra Akureyringa í dag.
Eins og kom fram á handbolta.is í morgun þá eiga átta íslensk félagslið þess kost að taka þátt í Evrópukeppni félagsliða á næsta keppnistímabili. Þar af geta landsmeistararnir, Valur og KA/Þór, tekið þátt í undankeppni Evrópudeildarinnar. Önnur lið geta skráð sig til í leiks í Evrópubikarkeppninni.
KA/Þór ætlaði að taka þátt í Evrópubikarkeppninni í fyrsta sinn á síðustu leiktíð og hafði dregist gegn ítölsku félagsliði, Jomi Salerno, þegar hætta varð við þátttöku vegna kórónuveirunnar.
Þegar ljóst verður snemma í júlí hvaða lið og hversu mörg lið skrá sig til leiks í Evrópudeildinni skýrist hverjir verða hugsanlegir andstæðingar KA/Þórs og hvort liðið tekur þátt í fyrstu eða annarri umferð keppninnar sem væntanlega hefst í september. Undankeppni Evrópudeildarinnar verður leikið með útsláttarfyrirkomulagi í nokkrum þrepum þar til 16 lið standa eftir sem dregin verða í fjóra fjögurra liða riðla sem mætast heima og að heima yfir háveturinn.
Flest meistaralið Evrópu og eitthvað af bikarmeisturum taka þátt í Evrópudeildinni þar sem aðeins nokkur af allra bestu félagsliðum Evrópu eiga keppnisrétt í Meistaradeild. Ísland, eins og flest ríki Evrópu, eiga þess ekki kost að senda lið til þátttöku í Meistaradeildinni.
